இன்று காதலின் நாள்

இன்று
காதலின் நாள்
அன்றைக் காதவரைக்
கைகோர்த்து விட்டவனின்
கடைசி நாள்
இன்றைக் காதலரின்
இதயம் மறந்துவிட்ட - அவன்
இறுதிநாள்

இன்று
பூ வியாபாரிகட்கோ பொன்நாள்
காதலர் மனம்கவர்ந்த
களியாட்டக்கடைகட்கு நன்நாள்
பார்க்கிலோ பெஞ்களிற்குப்
பற்றாக்குறை ஆகும்நாள்
பீச்சின் வியாபாரிக்குச் சுண்டல்
மிஞ்சாத ஓர்நாள்

இன்று
கலாச்சாரக் காவலற்குக் கரிநாள்
காக்கிச் சட்டைக் காரருக்கோ
கடமை கூடும்நாள்
அப்பாமார் அடிவயிற்றை
அரிக்கும் நாள் - அவர்
பாக்கட்டின் பணத்தையும்
சேர்த்தே பறிக்கும்நாள்

இன்று
காதல் சோல்ல இருப்போர்க்குச்
சோதனைநாள் - அதைச்
சொல்லித் தோற்றவர்க்கோ
வேதனைநாள்
வென்று விட்டவரோ வெளியில்
'வேலையாய்' அலையும்நாள் - வெறும்
என்னைப் போன்றவர்க்கோ
எப்போதும்போல் ஓர்நாள்