பின்னூட்டங்கள்

இதுவரை பின்னூட்டங்கள் எதையுமே சந்தித்திராத பதிவுத்தளம் இது. ஏன், என்னையும் என் சில நண்பர்கள், உறவினர்கள் தவிர வேறு யாராவது பார்த்திருப்பார்களா என்பது கூடச் சந்தேகமே. பின்னூட்டம் பற்றி என்னை எழுதத் தூண்டியது லோஷன் அண்ணா 15.01.2009 அன்று எழுதிய "சிறையில் அடித்தும் புத்தி வரவில்லையா?" என்ற பதிவுதான்.

( http://loshan-loshan.blogspot.com/2009/01/blog-post_15.html )

கவிதை என்ற பெயரிலான எனது கிறுக்கல்களை சேமிக்கவே இப் பதிவுத் தளத்தை உருவாக்கினேன். லோஷன் அண்ணாவின் பதிவுத் தளத்தின் வலதுபக்க மேல் மூலையிலுள்ள Create a blog என்ற இணைப்பினைச் சொடுக்கியே இதை உருவாக்கினேன். அவரது பதிவுகள் ஒன்று விடாது வாசித்து வருபவன் நான். அவரது இப் பதிவு அவர் மனதை மறைக்காது கூறியதுடன் சிந்திக்கவும் வைத்தது.

என்னைப் பொறுத்தவரை ஒரு பதிவிற்கு பின்னூட்டங்கள் அவசியமானவையே, எழுதிய கருத்துக்களிற்கு ஆதரவு, எதிர்க்கருத்துக்களையும், பதிவில் நாம் தவறவிட்டவற்றையும் சுட்டுபவை அவை பதிவின் சுவாரசியத்தையே சமயத்தில் அவை அதிகரிக்கச் செய்துவிடும். ஆனால் அப் பின்னூட்டமானது பதிவிற்கு இடப்பட வேண்டுமே தவிர அதை எழுதியவருக்கு அல்ல என்பது எனது அபிப்பிராயம். அவரது சுய கௌரவம், தனிப்பட்ட விருப்பு வெறுப்புக்களை தாக்குபவையாக அமையக் கூடாது.

ஒருவர் என்ன எழுத வேண்டும் எனத் தீர்மானிப்பது அவரேதான். தான் நினைப்பதை, அது அடுத்தவரைப் பாதிக்காதவரை எழுதும் உரிமை அவருக்குண்டு. தான் விரும்புவதை தானே ஒரு பதிவுத்தளத்தை உருவாக்கி எழுதுவதை விடுத்து அதை அடுத்தவர் மீது திணிப்பதும், தான் எதிர்பார்ப்பதை அவர் செய்யாதவிடத்து அவரை தனது பெயரையும் குறிப்பிடாது ஒற்றை வார்த்தைகளால் இகழ்வதும் காட்டுமிராண்டித்தனம் தவிர வேறில்லை.

இது நான் எழுதும் முதலாவது பதிவு. ஏனோ எழுத வேண்டும் எனத் தோன்றியதால் எழுதிவிட்டேன். இனியும் எழுதப் போகின்றேன். எனது எழுத்துக்களை பதிவுலகம் ஏற்றுக் கொள்கின்றதோ இல்லையோ, எனக்கும் எதிர்க்கருத்துக்கள் கிடைக்கின்றதோ இல்லையோ, எனது பதிவுகளை என்னைத் தவிர வேறு யாராவது படிக்கின்றார்களோ இல்லையோ, நானும் எழுதப் போகின்றேன். எனது பாணியில், எனக்குத் தெரிந்தவற்றை.